Kiwi-biblioteek open Afrikaanse boekrak!
‘n Afrikaanse boekrak is onlangs deur die East Coast Bays Library in Browns Bay, Auckland geopen. Dit volg na maande se werk deur Die Afrikaanse Klub van Nieu-Seeland om hierdie inisiatief van die grond te kry.
Van “Vertellers 2” en “Vrouevertellers 1843-1993”
tot “Triomf” van Marlene van Niekerk en “Die
muur van die pes” deur André P Brink is beskikbaar. Of dalk
val romanse soos in “Man in die skadu” of “Vrees
nie meer, liefling” meer in jou smaak. Of wat van “Ek
leer ken die natuur” of “Storiemuis” vir kleintjies
en die Harry Potter-reeks in Afrikaans ? Dit alles en meer is daar
te vind.
Hierdie Afrikaanse boekrak het sy ontstaan bykans twee jaar gelede gehad,
toe gesprek met die betrokke biblioteek gevoer is. Daar is ook in Suid-Afrika
met die ATKV gaan onderhandel oor die moontlikheid
dat hulle ‘n aantal nuwe Afrikaanse boeke vir die doel kon skenk. Hulle
het ingewillig en vandag kan Afrikaanse Kiwi’s op die noordoewer van
Auckland die letterkundige vrugte pluk.
Ongeveer 200 boeke is deur die ATKV se LAPA-Uitgewers
aan Die Afrikaanse Klub geskenk, hoewel dit twee eksemplare van elke boek
behels. Die Klub het gemeen om liewer met 100 boeke vir die eerste biblioteek
te begin en om die duplikaatstel beskikbaar te hou vir ‘n ander biblioteek
wat dalk mag belangstel om hierdie voorbeeld te volg. Ander boeke, wat in
‘n goeie toestand was, is ook deur die Klub bygevoeg en vorm dit ook
nou deel van die versameling. Dus is daar ‘n skaflike aantal boeke vir
leeshonger immigrante beskikbaar.
‘n Plaaslike sake-egpaar, Jaco & Brenda Bosman van die SA
Kaffee in Browns Bay, het die vervoer vanuit Suid-Afrika na
Nieu-Seeland geborg.
Die Afrikaanse Klub besef dat die klein stel boeke nie noodwendig die meerderheid
van leessmake sal bevredig nie. Daarom werk die Klub tans aan ‘n tweede
fase van hierdie projek. Mariette McClement, Bestuurskomiteelid belas met
Afrikaanse Taalprojekte, is besig om ‘n tweede stel boeke vanuit Suid-Afrika
aan te koop. Die Klub het ‘n paar duisend dollar vir hierdie doel geoormerk
en sal dit dus self aankoop. Die SA Kaffee sal weer
vir die vervoer daarvan instaan.
Om te kyk wat beskikbaar is, volg hierdie stappe:
- Gaan na http://draweb2.shorelibraries.govt.nz/
- Onder Highlight Books at, kies East Coast Bays Library en kliek dan Start
- Aan die onderkant van die volgende bladsy, tik in die blokkie langs What’s
it about:
- n Afrikaans fiction (vir Afrikaanse storieboeke)
- n Children’s stories Afrikaans (vir kinderverhale)
- n Afrikaans language texts (Afrikaanse nie-fiksie)
- n Afrikaans language texts children’s nonfiction.
‘n Beroep word op immigrante gedoen om die Afrikaanse rak te ondersteun. Hoewel ongelooflike toegeneentheid van ons Kiwi-vriende by die biblioteek ontvang is jeens die projek, kan hulle slegs met dienste voortgaan indien die publiek dit gebruik.
