Afrikaanse Kiwi’s wys hul gewildste Afrikaanse treffers aan
 |
 |
 |
 |
 |
 |
 |
 |
 |
 |
 |
 |
Die immergewilde Afrikaanse liedjie Kinders van die Wind
is deur Afrikaanse Kiwi’s aangewys as hul top Afrikaanse liedjie van
alle tye. Koos du Plessis se weergawe het Laurika Rauch se weergawe van dieselfde
lied met ‘n kortkop geklop.
Kort op “Kinders” se hakke was Steve Hofmeyr se gewilde Pampoen,
Gé Korsten met die romantiese Liefling van weleer
en Stuur groete aan Mannetjies Roux van Laurika Rauch.
Hierdie resultate was die gevolg van ‘n versoek aan Afrikaanssprekende
lesers van “Brokkies”, Die Afrikaanse Klub van Nieu-Seeland se
weeklikse e-pos nuusbrief, om hul mees gewilde Afrikaanse musiektreffers van
alle tye aan te wys. Afrikaanstalige treffers van enige era kon beoordeel
word.
‘n Baie goeie reaksie is ontvang, hoewel sommige van ons ouer lesers
laat weet het dat hulle sou verkies het om die saak eerder as “treffers”
per dekade” sou wou benader het, omdat hulle dit baie moeilik gevind
het om onlangse treffers met treffers van dekades gelede te vergelyk.
Desondanks het die Afrikaanse Kiwi’s hul sê gesê.
Die vyfde plek is gedeel deur Sweef soos ‘n arend (Danie
Niehaus), ’n Liedjie vir jou (Jannie du Toit), Droomvrou
(Lucas Maree) en Lisa se Klavier (kunstenaar nie vermeld
nie, hoewel die liedjie oorspronklik deur Koos Kombuis geskryf en gesing is).
Die volgende vyf plekke is ingeneem deur Beautiful in Beaufort-Wes,
‘n liedjie geskryf deur Gert Vlok Nel, soos gesing deur Theuns Jordaan,
Blou Bul (Steve Hofmeyr), Dis ‘n land
(Carike Keuzenkamp), Duitswes Wals (Randall en Koba Wicomb)
en Hoeka Toeka (Carike Keuzenkamp).
Plekke 11 tot 20 word ingeneem deur Jantjie (Sonja Herholdt),
Maak die Bulle almal Bokke (Steve Hofmeyr), Royal
Hotel (David Kramer), Ska-Rumba (Juanita du Plessis),
Skipskop (David Kramer), Sprokie vir ‘n Stadskind
(Koos du Plessis), Voshaarnooi (Louis van Rensburg), Al
lê die berge nog so blou (Johannes Kerkorrel), Kinders
van Afrika (Lochner de Kock & Richard van der Westhuizen) en
Hak hom Blokkies (David Kramer).
’n Paar interessante keuses was Die dapper muis (Carike
Keuzenkamp), Die gezoem van die bye (Des en Dawn Lindberg),
Die wiel van geluk (Min Shaw), Hier is ‘n mens
(Gé Korsten), Hillbrow (Johannes Kerkorrel), Hoor
jy my stem (Rina Hugo), Rugbyonthaal (Leon Schuster),
Vanaand gaan die volkies koring sny (Scallibrak) en Liewe
Lulu (Blackie Swart).
Een leser het sommer sy Top 20 aangebied (al is net die Top 5 gevra) en AL
20 posisies aan net een liedjie gewy: Maak die Bulle almal Bokke
van Steve Hofmeyr! Hy is duidelik ‘n rugbygeesriftige…
Hiermee bedank Die Afrikaanse Klub graag alle deelnemers aan hierdie pretwedstryd.
Die wenners sal in “Brokkies” aangekondig word.
